كيفاش تصايب موقع الالكتروني من الألف إلى الياء ؟

عندك فكرة مشروع أو منتوج ولا عندك جمعية أو تعاونية، ولا راك قديم فالخدمة و ناوي دير موقع الكتروني للشركة ديالك و لكن ماعرفتيش منين غاتبدا! مرحبا بكم فهاد المقال اللي غانشارك فيه معاك، كيفاش تقاد موقع الالكتروني من الألف إلى الياء و غانشرح ليك كاع المصطلحات اللي كاتستعمل بأسهل طريقة ممكن باش تفهم و تبدا الخدمة فالموقع أو المدونة أو السطور ديالك.

أفضل طريقة باش تعلم، هي تطبق داكشي اللي غاتقرا هنا، و ايلا عندك شي تساؤل تواصل معايا فالواتساب : 00212.700.748.046 أو خد موعد مجانا و غانكون فرحان نعاونك. أو خلي الايميل توصل بمقالات و كتب غاينفوك تزيد بالخدمة ديالك للقدام :

الشق النظري

علاش خاص اكون عندك موقع الالكتروني ؟

باش نجاوب على هاد السؤال خاص نقسموه على جوج د الأنواع :

النوع الأول : ايلا كان الهدف ديالك تصايب موقع للمشروع ديالك، مثلا كادير التجارة الالكترونية أو عندك شركة :

  1. الموقع الالكتروني غادي اعاونك تجمع البيانات على الناس اللي مهتمين بالمنتوج ديالك، و هكا غادي تسهال عملية الاستهداف ديالهم، و بهكا غايطيح الثمن باش كاتقام عليك المبيعة (خلي ليا الايميل ديالك لفوق، نشرح ليك أكثر)
  2. إدارة التجارة ديالك، غاتكون أسهل بكثيييييير من أنك تبقى تواصل مع الزبناء فالهاتف و تحاول تقنعهم اشريو، في حين الموقع كاتحط فيه جميع المعلومات و اللي مهتم غادي اطلب المنتوج مباشرة فالموقع، و بهكا كاتربح بزاف د الوقت و كاتهنا من صداع الراس
  3. عوض تجيب الزبناء غير من فايسبوك ولا انستغرام و بالاعلانات، الناس اقدرو القاوك نيشان من جوجل، ايلا كان الموقع ديالك مخدوم ليه السيو SEO مزيان، و بهكا غاتزيد المبيعات بشكل ملحوظ
  4. أهم من هادشي، الخدمة ديالك كاتولي تبان أكثر جدية و مهنية، و كادير سميتك فالسوق و هادشي كايعاونك تنظم الخدمة ديالك.
  5. ثاني أهم شيء هو أن المشروع ديالك كاملو كايكون مستقل تماما، بمعنى مكاينش شي حد طرف ثان كايتحكم أو كايشوف المعلومات الخاصة ديالك. (الهضرة على صحاب يوكان اللي كاتمشي ليهم الطلبيات بمجرد كايتوصلو بها)
  6. ثالث أهم شيء، هو انه مكاتخلصش شهريا بحال شوبيفاي 300 درهم للشهر و ايلا حتاجيتي تقنيات اخرى فالموقع ديالك، غايخصك تشريها، في حين الموقع ديالك، كاتخلص غير الاستضافة و اسم النطاق (شي 900 درهم للعام) و صافي (هادشي ايلا كنتي غاتصايبو بوحدك و ايلا كنتي محاج اللي اهنيك فتواصل معايا).

النوع الثاني : ايلا كان الهدف ديالك تعلم تصايب المواقع، باش تقدر تخدم على راسك :

  1. كولشي اللي فالنوع الأول +
  2. كاتجي ناقصة تقول للناس نتا كاتقاد المواقع الالكترونية، و نتا كاع ماعندك
  3. كاتحط الخدمة اللي خدمتيها من قبل، و هادشي كايعاون بزااااف فإقناع الناس اخدمو معاك
  4. عوض “تكتفي” بمواقع الفريلانس فين كاتكون المنافسة طالعة بزاف و ماتقدرش تحط كولشي، كادير الموقع ديالك و تحط فيه اللي عجبك

مصطلحات تقنية مبسطة لفهم أسرع

مكنضنش كاين شي شرح أسهل و أوضح من هذا. كما كاتشوف، الاستضافة هي الأرض فاش كانحطو الموقع ديالنا و البريد الالكتروني المهني ديالنا (مثلا contact@damouhstore.com)، دبا السؤال هو كيفاش غانبنيو داك الموقع ؟

كاينين بزاف ديال الطرق باش نبنيو الموقع الالكتروني (الدار) ديالنا، بزاف ديال الآليات اللي ممكن نستعملوهم :

  1. الطريقة الأولى : البالا و البرويطة مع شي طاشرون (مطور أو مبرمج)، هنا كانهضر على تبني كولشي من الصفر و كاتقام غالية و كاتخد بزاف ديال الوقت.
  2. الطريقة الثانية : CMS = Content Management System، بحال wix أو wordpress، اللي كايخلينا نتعاملو بلغة البرمجة بطريقة غير مباشرة، و كايخلينا نبنيو شحال مابغينا فأسرع وقت

فهادالمقال غادي نخدمو بوردبريس wordpress و غادي تشوفو البناء من الألف إلى الياء.

ملي كاتسالي الأساس، كادوز المحتوى اللي غايشوف الزبون (مول الموقع) فاخر المطاف. و كانبغي نشير فهاد. النقطة انه هنا كايبان الفرق بين المحترفين و بين المخربقين اللي كايصايبو المواقع ب جوج د ريال، علاش ؟

حيت الزبون كيما قلنا كايشوف غي الأثاث و كايحكم، مكايشوفش فالسانسور ولا الدروج باش توصل لديك الغرفة (سرعة الموقع) و مكايشوفش الطريق من غرفة لغرفة (Navigation) و المشكل العويص، مكايشوف ايلا جاب الله وقع ليه شي مشكل فالضو circuit و الناس اللي بناو الدار ماداروش الديجانكتور disjoncteur و هادشي كانعني بيه backup، الزبون مكايشوفش هادشي حتا افوت لفوت.

هادشي ايلا افترضنا أن الأساس صحيح و أنك مابنيتيش فمنطقة الزلازل (شي استضافة عيانة)

الموقع ديال البيت الأبيض، مصايب بوردبريس wordpress غير باش تعرف القوة ديال هاد الأداة الرائعة.

المسائل الي خاص ترد ليهم البال فبناء الموقع الالكتروني

بحال غاتصايبو نتا ولا غاتجيب اللي غايصايبو ليك، كاينين شي مسائل خاص تحتارمهم قبل ماتبدا :

  1. الاستضافة أو الأرض ديالك، خاصك تعرف فين غاتبني و ترد البال للمناطق اللي فيها الزلزال، أي الاستضافة المجانية أو الرخيصة، باغي تبني بني على الصح، أنا كانصحك تستعمل bluehost حيت جربتهم و خدمت معاهم.
  2. الباك اب backup هو ان ملي كايوقع شي مشكل فالموقع ديالك، وكايجيب الله كايطيح كاتقدر ترجعو كامل لاخر تحديث مثلا ليوم قبل الحادث.
  3. شهادة SSL : باش تأمن الموقع ديالك
  4. اختيار الاضافات الصحيحة Plugins …

الشق التطبيقي

مراحل إنشاء الموقع الالكتروني

فهاد الفقرة، غادي نشارك معكم الطريقة ديالي في البناء، حيث كل واحد و كيفاش و باش كايبدا … حاولت فالطريقة ديالي نكون أكثر تنظيم باش نقدر نربح الوقت أكثر، لهذا فهاد ثلاث سنوات اللي دوزت فالمجال وصلت لهاد الطريقة :

المرحلة الأولى : شراء الاستضافة و اسم النطاق

باش نشريو الاستضافة، كانصح ب bluehost لعدة أسباب :

  • سرعة الاستجابة
  • backup الاوتوماتيكي
  • شهادة الأمان المجانية
  • اسم النطاق مجاني لمدة عام
  • لوحة التحكم سهلة و واضحة جدا

خدمت مع bluehost هادي كثر من خمس سنوات و أكثر حاجة كاتعجبني معاهم هو خدمة العملاء، تعلم معاهم بزاف ديال المسائل التقنية و كايجاوبو بشكل سريع على أي حاجة متعلقة بالاستضافة عندهم.

و نزيدكم، أنا داير شراكة مع bluehost ايلا شريتي من عندهم الاستضافة من هاد الرابط :bit.ly/rbcombluehost كانربح واحد النسبة ديال الفلوس، بلا مايتزاد عليك سنتيم.


كنصحك تختار PLUS حيتاش كاتقدر دير بزاااااف ديال الموقع فاستضافة وحدة و كايتقام تقريبا ب 900 درهم للعام : الاستضافة و اسم النطاق مجموعين :


مورا اختيار التعريفة، كاتختار اسم النطاق اللي بغيتي (مثلا damohstore.com) :


ملي كايكون داك اسم النطاق اللي ختاريتي متاح، كاتقدر تاخدومع الاستضافة، ايلا مكانش متاح جرب واحد اخر حتا تلقى اسم متاح، و موراها كاتعمر كلع المعلومات المهمة :


ختار 12 شهر و رد البال لدوك الخانات، حيث غالبا داكشي ماغاتحتاجوش، موراها كادخل معلومات البطاقة البنكية باش غاتشري الاستضافة.


موراها مبروك عليك، ها الاستضافة و اسم النطاق عنك :


المرحلة الثانية : إعداد الووربريس

في حساب الاستضافة، كتمشي ل “My Sites” موراها “Add site” :


موراها كاتختار اسم النطاق اللي شريتي و كادير Next

مورها غادي اتعطا ليك واحد الرابط واسم المستعمل و كلمة المرور :

غادي دخل لداك الرابط و غادخل اسم المستعمل و كلمة المرور اللي تعطات ليك :

و أخيرا راك فالووربريس الخاص بك، و هنا فيك كايبدا الابداع

و الموقع ديالك، كايبان بحال هكا :


المرحلة الثالثة : إنشاء الموقع

هادي هيا المرحلة النهائية باش نصايبو الموقع ديالنا (نفتارضو بغينا نقادو موقع لشركة معينة و نقدمو الخدمات و المشاريع اللي خدماتهم)، غانتبعو هاد الخطوات :

  • الخطوة الأولى : هندسة الصفحة و كتابة المحتوى
  • الخطوة الثانية : تفعيل الاضافات (Plugins)
  • الخطوة الثالثة : إضافة المحتوى
  • الخطوة الرابعة : إضافة الاستمارة
  • الخطوة الخامسة : تعديل القائمة الرئيسية (Menu)
  • الخطوة السادسة : إضافة الشعار و الأيقونة
  • الخطوة الأخيرة : إظهار الصفحات و إطلاق الموقع

الخطوة الأولى : كنعتبرها مهمة جدا، لربح الكثير من الوقت و حتى كايكون كولشي منظم هي نقادو هندسة أولية للصفحة اللي بغينا نقادوها، غس جدول ف اللورد مثلا :

الخطوة الثانية : غادي نفعلو الاضافات (Plugins) و القالب (Theme) اللي غادي نخدمو بيهم

  • غانقدمو بقالب : Astra
  • باش نبنيو التصميم اللي بغينا غانخدمو ب : Elementor
  • باش نقادو استمارة التواصل غانخدمو ب : wpForm

و ما تبقى غادي نمسحوه.

أولا : القالبTheme

فالقائمة الجانبية، غاتلقى : Appearance => Themes

ضغط على Install و بعدها Activate و ها كيفاش غايولي ايبان الموقع ديالك :

ثانيا : الاضافاتPlugins

غانمسحو كولشي الاضافات اللي كاينين دبا و بعدها غادي نجيبو اضافات جداد : Elementor, WpForm. باش تمسح شي إضافة، خاص دير أولا Deactivate و بعدها Delete.

ضغط على Install Now و بعدها Activate و موراها غادي نديرو إنشاء الصفحة الرئيسية ديالنا :

نسميو الصفحة ديالنا home و مورها نضغطو على edit with Elementor

عندنا جوج امكانيات يا إما نصايبو الديزاين من الاول ولا نستعمل شي نموذج من هادو :

هنا غادي اخصك يكون عندك حساب ف elementor.com راه مجاني

ثالثا : إضافة المحتوى

و هنا كاتبدا تعدل على الصفحة حتا كاتخرج كما درنا فالهندسة الأولية ديالها. أي حاجة درتيها ماتنساش دير Update مورا مادرتي فالأول Publish

رابعا : إضافة الاستمارة

دبا خاصنا نزيدو استمارة التواصل، غانمشيو للاضافات و نقلبو على wpform و نحملوه و بعدها نفعلوه :

غادي اعطيك واحد الكود صغير بحا هكا :

و داك الكود غادي تزيدو فالصفحة الرئيسية اللي بغيتي تبان فيها ديك الاستمارة

خامسا : تعديل القائمة

كادير Create Menu :

كادير Next كاينة لتحت و بعدها كاتزيد مكونات القائمة ديالك، حنا دبا انخدمو غي ب Custom Links و عقلو على داك URL حيت غادي نعاودو نديروه فالصفحة كما درنا ديك الاستمارة :

دبا داك Custom Link غادي نزيدوه فالصفحة ديالنا :

سادسا : إضافة الشعار و الأيقونة

اتمشي ل Appearance و بعدها Customize و بعدها Header Builder :

الخطوة الأخيرة : إظهار الصفحات و إطلاق الموقع

أخير حاجة دير Save Changes و مبروك عليك، تعلمتي مهارة اللي ممكن تعيش منها.

10 طرق للربح من الأنترنت

بزاف د ناس كايعرفو غي التجارة الالكترونية كطريقة د الربح من الأنترنت و بنادم جاهل بزااااااف ديال الطرق اللي ممكن اعيش و يعيش منهم ! فهاد المقال غادي نهضر على هاد الطرق بشكل عام و اللي بغا التفاصيل ديال كل حاجة، اقلب فالحاج جوجل، راه المعلومة مشتتة غا اللي ما بغاش، أما شناهي أفضل الطرق هاد السؤال نتا الوحيد اللي ممكن تجاوب عليه، حيت كل واحد و فين لقا راحتو.

الربح من الأنترنت ما هو إلا وسيلة من الوسائل ديال التعامل مع الناس، أنك تفهم كيفاش كايفكرو و شنو محتاجين و تعطيه ليهم، راه النتيجة الحتمية هي غادي تخلص على خدمتك بطريقة أو بأخرى. غي ماتعطيش كلشي فابور. 

باش دير الفلوس بسرعة بلا ماتحلم بيها و ايلا جيتي تقرا هاد المقال على هاد الغرض غي رجع دور فالفايسبوك و تغطى تحت المانطة و قلب على اللي اصرف عليك، حيث أول حاجة خاصك ديرها هي تبدل العقلية.

الطريقة الأولى : التجارة الإلكترونية – Ecommerce

التجارة الالكترونية، هي ملي كاتشري السلعة و كاتحطها عندك فالدار و كادير الاشهار، ملي كايطلبوها ليك الناس كاتسيفطها ليهم، و بعدها الليفرور كايتخلص من عند الناس و كايجيب ليك رزقك و كاتعاود نفس البلان. غي خاصك تعرف كيفاش تقاد استراتيجية ناضية للتسويق للمنتوج ديالك.

التجارة الالكترونية هي المعروفة بزاف و كلشي كايتلاح وتا هو بغا ايولي ابيع و يشري و خا بينو و بين التجارة غي الخير و الاحسان. التجارة الالكترونية كاتبقا تجارة و خاصك تعرف أساسيات العرض و الطلب. ماشي دير باج فايسبوك و كاتبقا دير الاشهار هي التجارة، اراااد البال أبن عمي.

الطريقة الثانية : التسويق بالعمولة – Affiliate Marketing

تخايل معايا، جاركم سي المعطي بدا كايبيع الحوايج فالأنترنت، تلاقيتيه واحد نهار فالقهوة فين كاتقيل عاصر ليهم تما على ديك النوار، المهم بديتي كادوي مع السي المعطي، عرفك بللي غي ناشر وماكادير تا وزة فحياتك، قاليك أش بان ليك على كل بياسة بعتيها ليا غادي نعطيك فيها واحد النسبة، فرحتي و بديتي كاتفكر أشنو غاندير باش نجيب المبيعات، تما فين غادي اخصك تقرا على أبجديات التسوق الرقمي.

المهم بديتي كاتبرطاجي فالكروبات و درتي الادس و نهار العيد قلتي لمالين الدار هاد المرة غادي نتقداو عند سي المعطي، سولوك علاش ؟ قلتي ليهم عندو داكشي نقي و جودة عالية و حتى الثمن مناسب … اعلي عليك الكذيذيب. المهم أسيدي ضربتي معاه الصريف و راك فرحان.

هذا هو التسويق بالعمولة، بلاصة سي المعطي ممكن ديرو مع أمازون و أي قرتاحنة ممكنة، و حتا اينوفاجيت، جيب ليها زبون محتاج إدارة السوشل ميديا، و غاتخد 300 درهم حلالا طيبا.

الطريقة الثالثة : دروبشيبينغ – Dropshiping

مصطلح اخر ديال كاتبيع الحوت فالبحر، دبا تخايل التسويق بالعمولة تزوج بالتجارة الالكترونية، كايولدو لينا دروبشيبيغ! 

كادير موقع الكتروني كاتحط فيه صور ديال سلعة، كايجيو ناس كايشريو ديك السلعة -اللي غي تصاور- و عاد نتا كاتمشي تشريها و تسيفطها ليهم. هاد المثال غادي افهمك أكثر :

الطريقة الرابعة : Amazon FBA

هو التجارة الالكترونية اللي فبلاصة دير سطوك عندك فالدار، كاديرو عند أمازون و عوض تعامل مع شي شركة باش دير ليك التوصيل، أسيدي أمازون برايم هي اللي كاتكلف و عوض السلعة ديالك توصل ف 15 يوم، كاتولي توصل فيومين.

نزيد نشرح : اللي كايديرو هاد الطريقة هما فالغالب الناس اللي كايبيعو فميريكان، دونك عوض ايبقا اسيفط كل منتوج من شينوا لوشنطن و ياخد ليه بزاف دالوقت فالتوصيل، شنو كايدير ؟ كايطيح على شي منتوج ناضي و كايشري منو واحد كمية كبيرة و كايسيفطو لميريكان عند سطوك د أمازون، و فينما الناس اشريو عندو، أمازون كاتسيفط ليهم و دغيا كاتوصلهم السلعة و هادشي كايخلي سطور ديالك غادي فالربحان أحمادي.

الطريقة الخامسة : Print On Demand

كي ديما خاصك تعرف شنو الناس باغيين، و بعدها كادير شي تصميم زوين و كاتحطو فمنصات خاصة بهادشي، كاينين نوعين د هاد المنصات :

  • النوع الأول : غي عطيهم الديزاين و نعس على جنب الراحة، هما كايتكلفو بالتسويق و الطباعة و الشحن و التوصيل، طبعا الربح غادي اكون أقل من النوع الثاني.
  • النوع الثاني : كاتصايب ديزاين، و كاتحطو عندهم، هما كايتكلفو غي بالطباعة، الشحن و التوصيل، التسويق كايبقى خاصك ديرو نتا.

اللي خاصك تفهم فهاد الطريقة هما المراحل اللي كادوز منها :

  1. اختيار الموضوع : خاصك تلقا شي حاجة كاتمشى مزيان و فهاد الصدد واحد الصديق ديالي لونسا منصة كاتعاونك تلقا المواضيع الي عليهم الطلب، المنصة سميتها : redbubbler.club
  2. التصميم
  3. التسويق
  4. الطباعة، الشحن و التوصيل

كنت هضرت على Teepublic فواحد المقال فاينوفاجيت، كانوري فيه الخطوات من الألف الى الياء كيفاش تبدا هاد البيزنيس.

الطريقة السادسة : Amazon KDP

تكتب كتاب أو ديزاين ديال شي مذكرة و تحطو فأمازون، كيما ديما خاصك تعرف علاياش كايقلبو الناس بزاف و تعطيه ليهم. كلما كان الترتيب ديالك مزيان فأمازون كلما غاطالع للناس كثر، كلما غايكثرو عندك المبيعات، لكن رد البال راه واخا بعتي ايلا درتي غي تخربيق، الناس كايرجعو فلوسهم و كاطيح فالمستنقع ديال أمازون. يعني دير شي حاجة استافدو منها الناس أولا تخشا فالمانطة و سكتنا.

ملي كاتحط داك الكتاب فامازون، كاتحطو على أساس يا إمااتباع ك ebook أو كتاب مطبوع، كل نوع عندو رباح ديالو مختالف.

الطريقة السابعة : Google Adsense

كاتسمع الناس دارو الفلوس فيوتيوب، روتيني اليومي و داكشي، جزء من الارباح ديال يوتيوب كايجيو من هاد ادسنس. لكن اللي مكايعرفوش الناس هو أن هاد الجزء كايشكل تقريبا 1% من المداخيل د ليوتبرز. اللي بغيتك تعرف هو أن الناس فيوتيوب كايديرو الفلوس ماشي من أدسنس لكن من التسويق بالعمولة أو من الاشهار لشي ماركة معينة.

دبا شناهو أدسنس؟ سواء درتي قناة على اليوتيوب أو مدونة كاتقول لجوجل راه ممكن دير عندي الاشهارات و ملي الزائرين ديالك كايضغطو على داك الاشهار نتا كاتربح واحد ربعة د ريال (حرفيا)، على حساب الرقة الجغرافية اللي كايجيو منها الزائرين ديالك.

راه كاين فرق بين Google Ads و Google Adsense الأول داير بحال فايسبوك أدس غي هو ماكايتسدش بزاف xp، و الثاني هو اللي كايخلصك.

الطريقة الثامنة : الفريلانس – Freelance

كاتقدم الخدمات ديالك بحال التصميم أو الكتابة، مقابل الخلاص راه واضحة. أهم حاجة هو تكون عندك واحد المهارة و طحنها مزيان و كاتسجل فدوك المواقع الخاصة بالفريلانس أشهرهم Fiverr. لكن السؤال الفلسفي المطروح، هو كيفاش قدام واحد المنافسة شرسة (تحية للهنود) دير بلاصتك نتا.

هنا غانعاود ليك قصتي الشخصية، ملي كنت باقي كانقرا، كانو صحابي كايديرو الفريلانس ف فايفر و كل واحد و رزقو المهم غاديين، شي كايدير الديزاين شي كايحل التمارين.. المهم كايطبرو على راسهم فانتظار توصل المنحة. أنا كانتساءل كيفاش ندير واحد الحاجة بعيدا على هاد المنافسة، و هنا طاحت علي الفكرة ديال نبدل “السوق المستهدف” هي أصعب لكن ملي كاتشد كاتولي تبيع بالثمن ديالك.

عوض نمشي لواحد السوق فيه منافسة كثيرة و بالتالي الأثمنة ناقصة بزاف، خدمت المعارف ديالي و اللي محتاج اصايب موقع الكتروني أو إدارة السوشل ميديا، كايولي اجي نيشان عند رشيد.

الفريلانس أو أي خدمة أخرى ملي كاديرها بإتقان كاتولي الخدمة ديالك هي المسوق رقم واحد ليك، و لهذا التواصل و الاتقان هما السر. ها باش كانصحك باش تبدا :

  1. خاصك تخدم فابور باش تبني الصورة ديالك
  2. خلي الناس تعرف اشنو كادير، مافيها تا عيب
  3. عرض الخدمة ديالك فشي كطالوغ (اتلقا مثال ديالي هنا) أو موقع الكتروني (اتلقا مثال ديالي هنا)
  4. كن اجتماعي و هضر مع الناس فالمجموعات الفايسبوكية
  5. سيفط الايميلات للناس اللي كاتعرف، اعرفوالخدمات ديالك
  6. ماتحشمش ملي تهضر على الثمن و ثق فشنو كادير
  7. أبدع ابن عمي

الطريقة التاسعة : الإشهار – Advertising

عندك شي كونط انستاغرام كبير أو شي قناة على اليوتوب، كاتبقا دير مع الشركات تهضر ليهم على المنتوجات ديالهم مقابل واحد الثمن معين. كاين اختلاف مع التسويق بالعمولة، حيت ماكاتخلصش على كل مبيعة درتيها، لكن غي حيت هضرتي عليهم، و هذا هو المصدر رقم واحد ديال دوك الناس اللي عندهم كونط كبير فانسطاغرام.

الطريقة العاشرة : الانخراط الشهري – Subscription Business

مثلا فاينوفاجايت الزبناء كايديرو انخراط شهري باش نقادو ليهم منشورات أسبوعية فالسوشل ميديا ديالهم، كيتهناو منها و مكاتبقاش الصفحات ديالهم خاويين. اينوي أو اورانج كاتعطيك واحد الخدمة و كاتبقا تخلص بالشهر. نفتارضو عندك تجارة الكترونية ديال الخضرة و الناس دارو عندك انخراط شهري باش كل نهار الاحد تسيفط ليهم خنشة ديال الخضرة (ماعرفتش واش كاينة ولكن تصلاح كبيزنيس).

الطريقة الحادي عشرة : التداول

المهم ماعنديش بزاف د المعلومات فهاد الميدان، قلب من عندك و بقشش شوية.

الخلاصة

مكاينش غي هادشي، لكن أغلب هاد الطرق كاتحتاج دراسة معمقة لحاجيات الزبون، خاصك تفهم أبن عمي شنو كايتمشا و شنو غي معمر السوق، و هذا هو الفرق بين اللي دار الحبة و اللي غي كايحاول سيمانة و كايرجع اتباكى و كايبقى مصدع الوقت وا مكاين مايدار.

الربح و العيش من الانترنت راه حقيقي و ماشي غي كذوب. خدم عقلك و خطط مزيان، أهم خطوة فهاد العالم هو تعرف شنو محتاجين الناس، ايلا فهمتي هادي راك ضربتي نص الطريق و النص الاخر حلو ساهل.

ايلا بغيتي تعرف الأثمنة ديال الخدمات اللي كانقوم بيها، جيب دورة فهاد التقديم والسلام عليكم ورحمة الله.

كيفاش نقاد استراتيجية تسويقية للمنتوج ديالي ؟

كيفاش نقاد استراتيجية تسويقية لمنتوج ديالي ؟

عندك منتوج و بالرق الناشف باش جمعتي واحد جوج د ريال د راسمال باش خديتيه و دبا حصلتي كيفاش غاتبيع. سمعتي بشي حاجة سميتها التسويق الرقمي و قلتي أش اوا هاد العجب ثاني، مالك مخلوع ؟ ما تخاف ما والو، سير قرا أبجديات التسويق الرقمي المغربي ايلا كنتي ماعندك تا فكرة و رجع كمل هنا باش تعرف كيفاش تصايب واحد استراتيجية ناضية باش تبيع المنتوج ديالك.

خلي الايميل ديالك باش نبقا نعلمك بالمقالات جداد :

هاد القصة من نسج الخيال، درتها لدواع تعليمية لاغير.

تفتح محل جديد (نسميوه بقالة اشتوكة) عندكم فالحي جا فالشوكة فواحد القنت فيه الناس محتاجين محل فين اتقداو المواد الأساسية اليومية. كل مرة كادوز حداه كاتلقاه عامر وكاتسأل مع راساتك (وخا هو سؤال غبي) كيفاش دار ليها، كيفاش حتى هاد المحل دغيا ولاو عندو كليان ! و بيني و بينك راه باينة :

  1. المحل كايبيع المواد الغذائية الأساسية
  2. جا فواحد الحي مافيهش أصلا شي مول الحانوت
  3. جا فالشوكة، يعني باين للناس

دبا سؤال : واش مول الحانوت دار شي ادس ولا شي سيت ولا شي استراتيجية … ؟ لا، علاش ؟ حيث أصلا الناس كايدوزو قدامو و كيبيع شي حاجة اللي هما محتاجينها و معروفة بحال زيت العود تمازيرت.

دبا فنفس الحي، غي لداخل شوية حدا داركم تحل محل واحد اخر ديال الملابس (نسميوه ملابس الأناقة) و ملي كادوز حداه كاتشوف الفراغ التام ولا شي عيالات كايجمعو تما. و بقا على نفس المنوال لأشهر بدون مبيعات.

دبا أجي نشوفو علاش “ملابس الأناقة” ماداروش المبيعات :

  1. الملابس بشكل العام ماشي من المواد الأساسية
  2. الناس ديال الحي ديالكم كايمشيو القيسارية فالأعياد
  3. المحل مكاتزورو غير الحاجة طامو ملي كاتخرج من الحمام و كاتبغي تكلس ترتاح
  4. المحل كايوفر ملابس بجودة عالية و لكن الثمن الأصلي طالع

نديرو واحد المقارنة بسيطة مابين بقالة اشتوكة و ملابس الأناقة :

بقالة اشتوكةملابس الأناقة
كيفاش كايعرفوه الناس ؟كايدوزو حداه يوميا
كايبيع الخبز سخون
كاتعرفو الحاجة طامو ملي كاتبغي ترتاح
شحال الثمن ؟أثمنة شعبية أثمنة ديال القيسارية فليلة د عيد الكبير
شحال كايربح ؟شي مليون فالشهر تقريباكايتسالو مول الكرا شهرين

مول ملابس الأناقة -سي المعطي-، كتاشف هاد المدونة و قدر اتعرف على التسوق الرقمي فقرر اصاوب استراتيجية خاصة به بعيدا عن كوبي كولي، نكتاشفو شنو دار :

الجزء الأول من استراتيجية ملابس الأناقة

  1. سي المعطي قرر اخرج من داك المحل اللي كايدي ليه الفلوس غير هكاك ودا سلعتو للدار
  2. شاف البياسات اللي عندو و ختار أكثر وحدة ممكن تباع فديك المدينة فين ساكن، صباط كلاص 
  3. ها علاش ختار داك المنتوج : المدينة فيها الموظفين بزاف و كايبغيو اتفركسو مزيان
  4. سي المعطي، اقرر اركز على منتوج واحد و به غادي ازيد ابيع المنتوجات الاخرين 
  5. دار واحد الفيديو تسويقي ناضي لداك الصباط، بالتعليق الصوتي ديال راجل كايبين أهمية الصباط فإظهار الشخصية
  6. اللي حاول اركز عليه سي المعطي هو أنه كايبيع “قوة الشخصية” وماشي غي الصباط و هادشي اللي كتب فالوصف مع الفيديو
  7. صايب صفحة على الفايسبوك، بواحد الشعار نقي و متميز ماشي ديال الله ارحم الوالدين
  8. سي المعطي عرف أنه باش ابني البيزنيس ديالو، خاصو ابرهن على الكفاءة و الخبرة فالمجال ديالو، و هادشي اللي كايبينو فالمنشورات 
  9. ماكايبارطاجيش بشكل عشوائي، دار واحد الجدولة : منشورين فالسيمانة كايبيونو نقط القوة ديال ملابس الأناقة
  10. كتب جميع الأسئلة الممكنة اطرحهم الزبناء ديالو و جاوب عليهم، فينما تجي شي طلبية دغيا غايجاوب الناس
  11. سي المعطي شرا شي صيكان زوينين مطبوعة فيهم “ملابس الأناقة تشكركم على ثقتكم” مع نمرة د تلفون 
  12. سي المعطي عندو واحد الموطور من عام الفيل، قرر استعملو فالتوصيل فالمدينة ديالو باش ابني الأساس على الصح
  13. تكلف هو شخصيا اهضر مع الناس و اخلي تجربتو و خبرتو فالصباط تنفعو

تال هنا، سي المعطي دار استثمار بسيط (الشعار + صيكان صغار + المنتوج ديجا كاين) الخطوات من 1 تال 13 هي جزء من الاستراتيجية اللي كانهضرو عليها. دبا هادشي الي مهم أي واحد كايديرو و كيفاش غايدير الفرق و اوصل لأكبر عدد ممكن ديال الناس باش افك السطوك قبل مايغمل.

كايقول الفار : اللي عندو باب واحد الله اسدو عليه

المرحلة الأولى هما الطرق الممكنة باش توصل الزبناء المحتملين. كما كاتشوف، كاينين بزاف ديال مصادر الزبناء … بزاااااف! كل منتوج و الطريقة المثلى فالتسويق ليه، نكملو مع السي المعطي.

” الناس يشترون عاطفيا و يبررون منطقيا”

شي واحد مهم

هذا مثال لمنشور دارناه لسي المعطي مع مجموعة من المنشورات باش اوصل فكرة الأناقة الرجولية و الشهامة باش اربطها المستهلك النهائي بمنتوجات محل ملابس الأناقة :

الجزء الثاني من الاستراتيجية

دبا اللي خاصنا نعرفو هو أن الاستراتيجية مزال ماسلاتش، السي المعطي قرا فهاد المدونة أن التجارة الالكترونية المحلية كاتواجه بزاف ديال التحديات منها :

  • مشاكل فالتوصيل و التعطال
  • شي رسائل ديال شي ناس لا علاقة 
  • روتور : حتى كاتوصل عند بنادم و ماكيبقاش شاري
  • خاص اللي أكد الطلبيات و التوصيل و اللي جاوب على الرسائل و اللي اهضر مع المزود …

سي المعطي حلف مايبدا حتى انضي شغالو، صبر كاع هاد الأشهر فمحل مع لالة طامو و كورونا بقات غي الأنترنت! دونك باش مايبقاش اهرس راسو مع صحاب “خويا كادير الكريدي ؟”، قرر ادير موقع الكتروني و من تما الناس كايدوز الطلبية و هادشي كايخول ليه إدارة السطوك بشكل منظم و رقمي.

بقات واحد المرحلة، سي المعطي هي فين غادي ادير الفرق و الابداع، هي فين كاتبان الشطارة و كاطحن المنافسة. باش اجيب شي فكرة ناضية سي العربي دار لائحة د الأفكار المبدعة اللي طاحو ليه فراسو :

  1. ابقا اعطي السيراج كادو مع الصباط
  2. مسابقة فالفايسبوك و اللي اربح اعطيه الصباط مع التوصيل فابور
  3. “خود ليك و لخوك”
  4. “تفكر أستاذك”
  5. “فرحي راجلك بصباط اللي كايعجبو”
  6. “أحسن كادو د عيد الحب لبوركابي” هههههههه
  7. أبدع ابن عمي …

دبا غي بيني و بينك، أشمن منشور غادي تعطيه الأهمية ؟ رحم الله عبدا إذا عمل عملا صالحا فأتقنه.

الخلاصة

ختارعت هاد القصة باش نقدر نعطيك مثال لكيفاش تقدر تصايب استراتيجية ديالك خطوة بخطوة، هاد المقال نتيجة للتجربة و الخبرة د خمس سنوات. الانسان خاصو اجرب و احاول و خصوصا اخطط و اعرف فين غادي، ماشي غي ابقا اتبرع لفايسبوك كل نهار ب 10 دولار. الخدمة المتقونة هي الوحيدة اللي غادي توكلك الحلال. وباش نكونو واضحين الاشهار ضروري منو، لكن أغلب الناس كايفشلو حيت كايتساحب ليهم جيب منتوج فدرب عمر و حل باج فايسبوك راه غادي اتقطرو المبيعات. حاجة اخرى هي كانصحك دير موقع الكتروني ايلا قدرتي ديرو راه أفضل بكثير من الميسانجر و الواتساب، كاتنقص عليك بزاف ديال الصعوبات، و حتى من الاشهار كاتخدم فايسبوك بيكسيل و كايطلعو المبيعات.

ايلا بغيتي تعرف الأثمنة ديال الخدمات اللي كانقوم بيها، جيب دورة فهاد التقديم و بارطاجي مع صاحبك اللي محتاج هادشي، والسلام عليكم ورحمة الله.

أبجديات التسويق الرقمي المغربي

أول مقال فالمدونة ديالي بالدارجة على التسويق الرقمي

مرحبا بك فأول مقال بالدارجة على عالم التسويق الرقمي، هاد المدونة درتها على قبل نجاوب على تطلعات المغاربة البساط اللي عندهم بيزنيس و محتاجين دفيعة باش ارقمو العمل ديالهم و اكبرو المبيعات باستعمال تقنيات واستراتيجيات التسويق الرقمي.

خدمت في ميدان التسويق الرقمي هادي أزيد من خمس سنوات و أسست وكالة للتسويق الرقمي اينوفاجيت و الخبرة اللي راكمتها فهاد السنين غادي نبارطاجيها فهاد المدونة الي غادي نهضر فيها على :

  1. السوشيال ميديا
  2. السيو
  3. فيسبوك ادس
  4. جوجل ادس
  5. التسويق بالعمولة

باش توصل بالمقالات المقبلة على التسويق الرقمي، خلي الايميل ديالك.

شنو هو التسويق الرقمي ؟

التسويق الرقمي ماشي هو فايسبوك و انستاغرام، التسويق الرقمي هو مجموعة من الطرق أو الاستراتيجيات باش توصل لأكبر عدد ممكن ديال الناس اللي مهتامين بالمنتوج ديالك.

هاد وسائل التواصل الاجتماعي ما هي إلا وسيلة من الوسائل الممكنة باش توصل لغاية تبيع المنتوج ديالك بشكل مستمر.

التسويق عموما كايبدا بتعريف الفئة المستهدفة و هي العمود الفقري ديال أي استراتيجية غادي تمشي فيها، حيتاش بلا ماتعرف على من كاتقلب راه ماغاتلقا غا الريح.

 قبل ما نبدا نكتب هاد المقال اللي حتى هو شكل من أشكال التسويق، درست السوق و كانت إمكانية نكتب بلغات اخرى، لكن الزبون النهائي ديالي هو مغربي كايهضر بالدارجة و بغا استثمر فبلادو و أنا كانعاونو افهم أولاد بلادو بشكل أعمق بكثير من واحد مسوق أجنبي.

هاد النص اللي كتبت لفوق هو مثال لكيفاش تقدر تعرف الفئة المستهدفة ديال واحد الخدمة أو منتوج. باش تزيد تفصل مزيان تعريف الفئة المستهدفة خاص تجاوب على مجموعة من الأسئلة بحال :

  1. شنا هي الفئة العمرية اللي كانستهدفها ؟
  2. شنو المشاكل ديال هاد الناس ؟
  3. شنو اللغة اللي كايهضرو بيها ؟
  4. كيفاش المنتوج أو الخدمة ديالي تقدر تنفعهم ؟
  5. فين غادي نلقاهم ؟ أشمن وسيلة التواصل كايستعملو كثر ؟
  6. معاياش كايكونو اونلاين ؟
  7. شحال كايتخلصو تقريبا ؟
  8. أشمن نوع د الوظيفة كايخدمو….

كلما فصلتي و جاوبتي كلما فهمتي أكثر عقلية المستهلك النهائي ديالك و كلما غادي تعطيه داكشي اللي كايقلب عليه، كلما غادي اشري من عندك و اهضر عليك و هذا هو أفضل تسويق ممكن توصلو، هو ملي اهضرو عليك الناس.

ادن باش نتفاهموا من دبا :

إدن ايلا لاحظتي مزيان أنه راه كاين فرق ما بين الاشهارو التسويق و المبيعات و البراندين، ملي غادي اكون التسويق ناضي، الناس غادي اتعرفو عليك، هاد المجهود ماغاتحتاجش تعاود ديرو مرة أخرى ايلا كنتي درتي البرانين اللي كايخلي الناس اعقلو عليك و بفضلو كايثيقوا فيك و كاتجي مرحلة المبيعات، الناس كايشريو من عندك. أهم شيء فهادشي كاملو هو أن المنتوج أو الخدمة اكون ناضي، حيت راه وخا تكون كاطير و قولبتي 100 واحد غاتفشل أبن عمي.

 كيفاش غادي اعاون البيزنيس ديالي ؟

غانجيك من الاخر: خاصك استراتيجية صحيحة و خاصك الفلوس. باش مانبقاش نفهم عليك بزاف، أجي نشرحوا هاد مصطلح “استراتيجية” اللي مصدعين به الوقت.

“الاستراتيجية” كايستعملوها الجنرالات فالحرب، ها كيفاش عرفتها الحاجة ويكيبيديا : : “الاستراتيجية أو علم التخطيط بصفة عامة هي مصطلح عسكري بالأساس وتعني الخطة الحربية، أو هي فن التخطيط للعمليات العسكرية قبل نشوب الحروب، وفي نفس الوقت فن إدارة تلك العمليات عقب نشوب الحروب.” 

البيزنيس هو حرب و ايلا ماكنتيش حربي، بلاما تحلم تاكل الخبز.

الفيلسوف رشيد بكار

دبا غاتسولنا، أمالنا أودي على الحرب، بقا ليا غي نجبد التجنيد الاجباري تا هو و القشلة و السلاح… اسمحو لينا اسيادنا، يالاه بالكم و خليونا ندخلو فالموضوع :

الاستراتيجية في التسويق الرقمي هي كيفاش غادي دير بالتفصيل الممل باش تجبد ليك الناس اللي مهتامين فداك العجب اللي كادير و شنوهما الوسائل و الأدوات اللي غادي تستعملهم لتحقيق هاد الغاية. 

الاستراتيجيات كايختالفو و الوسائل كثرو، ماشي بالضرورة تستعمل كولشي باش تحقق المبيعات و اللي خدام الاخرين ماشي بالضرورة غايخدم ليك. قبل اي خطوة كلس الارض و عرف شنو كادير و علاش كاديرو. 

راه ماكاينش غي فايسبوك ادس و راه ماشي ضروري تكون فانسطاغرام، كايقولو ناس زمان : لكل مقام مقال. نديرو مثال ديال كيفاش التسويق الرقمي اقدر اعاونك، نقولو اسيدي عندك محل كاتبيع فيه زيت العود و بغيتي تولي تبيع فالانترنت و ماعرفتيش منين تبدا :

  • كيما قلنا لفوق، أول حاجة هو نعرفو لمن غانبيعو، ادن الفئة المستهدفة ديالك هما المغاربة اللي كاتعجبهوم زيت العود فالماكلة و فطياب؛
  • المشكل هو بزاف د ناس كايبيعو زيت العود، كيفاش غادير الفرق ؟ و هدا سؤال مهم بزاف. غانقولو اسيدي الاستراتيجيت ديالك هي كاتعطي أجود زيت العود كاينا فالمارشي : زيت العود العطاوية و قلعة السراغنة و غادي تلعب على الثمن باش دير بلاصتك. و عوض غاتكون تقليدي فالخدمة ديالك بحال الأغلبية د ناس اللي كايبيعو فالفايسبوك، قررتي نتا تستثمر شوية فالخدمة ديالك و درتي ماركة جديدة سميتيها : تامزيرت :
  • قررتي غادي تستعمل الفايسبوك باش تسوق للمنتوج ديالك حيتاش من بعد غادي دير موقع الكتروني و فايسبوك هو الأفضل باش اسيفط ليط طرافيط -الزائرين- للموقع ديالك :
  • دبا كيفاش غادي غادي اكوموندي من عندي هاد زيت العود ؟ هنا غادي تقول أودي قبل ما نبدا السيت غادي نركز على فايسبوك مزيان و غاندير واحد الفيديو مزيانة كاتبين المنتوج ديالي و خصوصا الناس اللي جربوه قبل من الأقرباء و شنو كايقولو عليه و كدا….
  • خاصك تحدد نوع الأداء : واش االدفع عند التوصيل بمعنى حتى الزبون كايشد الزيت العود عاد كايخلص ولا الدفع المسبق بالبطاقة البنكية ولا بايبال….
  • من بعد ماغايكثرو عليك الطلبيات غادي ندير واحد موقع الكتروني و من تما الناس اكومونديو نيشان بلا مايهضرو معايا فالفايسبوك، و نقص علي صداع الراس.
  • لكن اللي خاصك ضرب ليه الحساب هو أن البيزنيس ديالك راه ماشي التسويق الرقمي بوحدو، ها هو البيزنيس ديالك :
التسويق و المتجر الالكتروني نقدر نصايبهم ليك، غير تواصل معايا

فهاد المقال، غادي تكون خديتي فكرة على التسويق الرقمي و عرفتي شناهي الاستراتيجية و شفتي باللي الناس دخلو فلوس صحيحة غي حيت عرفو كيفاش اخدمو التسويق الرقمي. خلي ليا الايميل ديالك باش نبقا نسيفط ليك أي مقال جديد كتبتو :

ايلا بغيتي تعرف الأثمنة ديال الخدمات اللي كانقوم بيها، جيب دورة فهاد التقديم و بارطاجي مع صاحبك اللي محتاج هادشي، والسلام عليكم ورحمة الله.